Aktuale

Në Kampin e Njësive Speciale në Vrellë është mbajtur prezantimi përmbyllës i trajnimit profesional “Ballafaqimi me turma”, i organizuar për zyrtarët e Policia e Kosovës nga Njësia për Reagim të Shpejtë dhe Siguri (NJRSH).

Sipas njoftimit zyrtar, në trajnim kanë marrë pjesë 65 zyrtarë policorë nga rajonet e Prishtinës, Ferizajt, Pejës, Gjakovës, Gjilanit, Mitrovicës së Veriut dhe Mitrovicës së Jugut.

Programi është udhëhequr nga instruktorët e Drejtorisë së Njësive Speciale Operative (DNJSO) dhe është zhvilluar në Kampin “Vrella” dhe në Qendrën e Njësive Speciale “Enver Zymeri”, me fokus në rritjen e kapaciteteve profesionale për menaxhimin e situatave me turma dhe ruajtjen e rendit publik.

Gjatë aktivitetit është realizuar edhe një skenar praktik, ku pjesëmarrësit kanë demonstruar aftësitë e tyre në situata të ndryshme sigurie.

Prezantimi është përcjellë nga afër nga drejtues të lartë të Policisë së Kosovës, përfshirë drejtorin Gazmend Hoxha.

Hoxha ka përgëzuar zyrtarët dhe instruktorët për nivelin e treguar të profesionalizmit, duke theksuar rëndësinë e trajnimeve të tilla për rritjen e gatishmërisë operacionale dhe kontrollin e situatave të sigurisë.