Ekonomi

Përdoruesit e telefonisë mobile në Kosovë, përveç tarifimeve standarde “Pay as you go” pas përfundimit të pakove mujore, po përballen edhe me humbjen e megabajtëve të internetit të pashfrytëzuar.

Sipas një raporti të Buletinit Ekonomik, dy operatorët mobilë në vend, Vala dhe IPKO, zbatojnë politika të ndryshme sa i përket bartjes së internetit të mbetur nga pakot mujore.

Kjo situatë vjen pasi Autoriteti Rregullativ i Komunikimeve Elektronike dhe Postare (ARKEP) nuk ka nxjerrë ndonjë vendim që obligon apo ndalon operatorët për bartjen automatike të megabajtëve të pashfrytëzuar. Për këtë arsye, secili operator vepron sipas politikave të veta.

Sipas të dhënave të siguruara nga Buletini Ekonomik, IPKO nuk ua ruan automatikisht përdoruesve gigabajtët e mbetur pas skadimit të pakove mujore. Në shumicën e rasteve, interneti i pashfrytëzuar humbet menjëherë pasi përfundon afati i ofertës.

Në përgjigjen zyrtare të kompanisë thuhet se benefitet e pakove vlejnë vetëm gjatë periudhës së përcaktuar të përdorimit.

“Kushtet e përdorimit, vlefshmëria dhe mënyra e funksionimit të pakove janë të përcaktuara qartë në dokumentacionin kontraktual dhe materialet informuese të publikuara nga IPKO”, thuhet në përgjigje.

Megjithatë, nga sqarimet shtesë të siguruara nga Buletini Ekonomik, rezulton se përdoruesit me kontratë mujore nuk e ruajnë internetin e mbetur në asnjë rast.

Sipas IPKO-s, vetëm disa pako pa kontratë mundësojnë ruajtjen e internetit, por vetëm nëse pakoja rimbushet një ditë para skadimit të afatit.

“Në pakot mujore me kontratë interneti (Infinit) nuk ruhet fare. Çdo herë me të parin resetohen megabajtët. Vetëm te pakot Tip, që janë pa kontratë – 6.99 euro me validitet 21 ditë, si dhe 7.99 dhe 9.99 euro me validitet 30 ditë – interneti ruhet nëse pakoja mbushet një ditë para skadimit të afatit”, kanë deklaruar nga IPKO.

Në rastet kur pagesa nuk bëhet para skadimit të ofertës, interneti i mbetur fshihet dhe përdoruesit nisin nga zero me aktivizimin e pakos së re.