Aktuale

Kolegji i Gjykata Supreme e Kosovës ka refuzuar si të pabazuar ankesën e subjektit politik Lëvizja Vetëvendosje ndaj vendimit të Paneli Zgjedhor për Ankesa dhe Parashtresa (PZAP), lidhur me refuzimin e kërkesës për organizimin e një tubimi politik në Sheshin “Skënderbeu” në Prishtinë.

Rasti lidhet me fushatën për Zgjedhjet e Parakohshme për Kuvendin e Republikës së Kosovës, të cilat pritet të mbahen më 7 qershor 2026. LVV kishte kërkuar që në të njëjtën datë dhe në të njëjtin lokacion të organizonte tubim politik, mirëpo kërkesa ishte refuzuar nga Komisioni Komunal i Zgjedhjeve (KKZ) në Prishtinë, pasi hapësira ishte rezervuar më herët nga Partia Demokratike e Kosovës (PDK).

Sipas dokumenteve të lëndës, PDK kishte dorëzuar kërkesën për shfrytëzimin e Sheshit “Skënderbeu” më 30 prill 2026, ndërsa LVV kishte paraqitur kërkesën e saj më 8 maj 2026, për të njëjtën ditë dhe të njëjtin vend.

Në ankesën drejtuar Gjykatës Supreme, LVV kishte pretenduar se PZAP kishte zbatuar gabimisht nenin 4 të Rregullores Zgjedhore Nr. 07/2024 dhe se vendimi ishte i mangët në arsyetim juridik. Sipas LVV-së, kërkesa e PDK-së nuk duhej të konsiderohej valide përparësie, pasi në kohën kur ajo ishte dorëzuar, KKZ në Prishtinë ende nuk ishte konstituar zyrtarisht.

Megjithatë, pas shqyrtimit të pretendimeve ankimore, përgjigjeve në ankesë dhe gjithë shkresave të lëndës, Gjykata Supreme vlerësoi se ankesa nuk qëndron dhe se vendimi i PZAP-së është marrë në përputhje me ligjin dhe rregullat zgjedhore në fuqi.

Në arsyetimin e saj, Gjykata theksoi se nenet e Rregullores Zgjedhore Nr. 07/2024 për Fushatën Zgjedhore, Monitorimin e Fushatës dhe Deklarimin Financiar i japin të drejtë KKZ-së të refuzojë një kërkesë për tubim politik në rastet kur hapësira publike është rezervuar paraprakisht nga një subjekt tjetër politik.

Po ashtu, Supremja sqaroi se rregullorja përcakton vetëm afatet përfundimtare për paraqitjen e njoftimeve dhe nuk ndalon paraqitjen e kërkesave para funksionalizimit të plotë të KKZ-së. Për këtë arsye, sipas Gjykatës, kërkesa e PDK-së konsiderohet e vlefshme dhe me prioritet procedural.

Gjykata hodhi poshtë edhe pretendimet e LVV-së për mungesë arsyetimi nga ana e PZAP-së, duke konstatuar se ky institucion kishte trajtuar në mënyrë të mjaftueshme çështjen e funksionalizimit të KKZ-së dhe kishte dhënë bazë të qartë juridike për vendimmarrjen.

Në përfundim, Gjykata Supreme konstatoi se gjendja faktike ishte vërtetuar drejt, nuk kishte pasur shkelje procedurale dhe nuk ishte zbatuar gabimisht ligji. Si rezultat, ankesa e LVV-së u refuzua si e pabazuar, ndërsa vendimi i PZAP-së mbeti në fuqi.