Aktuale
Mbikëqyrësi i OKB-së: Koreja e Veriut po shton kapacitetet me armë bërthamore
Koreja e Veriut ka bërë përparime “shumë serioze” në aftësitë e saj për prodhimin e armëve bërthamore, përfshirë mundësinë e shtimit të një impianti të ri për pasurimin e uraniumit dhe rritjen e aktivitetit në një kompleks kyç, ka deklaruar të mërkurën shefi i IAEA-s, Rafael Grossi.
Duke folur në Seul, kreu i Agjencisë Ndërkombëtare të Energjisë Atomike konfirmoi një rritje të shpejtë të aktivitetit në reaktorin pesë megavat, njësinë e ripërpunimit, një reaktor uji të lehtë dhe objekte të tjera në kompleksin bërthamor Yongbyon të Veriut.
Programi bërthamor i Koresë së Veriut vlerësohet të përfshijë disa dhjetëra koka bërthamore, tha ai në një konferencë për shtyp, duke përmendur shenja aktiviteti si funksionimi i një reaktori me ujë të lehtë dhe aktivizimi i objekteve të tjera përveç Yongbyon.
“Të gjitha këto tregojnë një rritje shumë serioze të aftësive të RPDK-së në fushën e prodhimit të armëve bërthamore”, ka thënë Grossi, duke përdorur inicialet e emrit zyrtar të Veriut, Republika Popullore Demokratike e Koresë.
Ai bëri të ditur se agjencia mbikëqyrëse ka vëzhguar ndërtimin e një objekti të ri të ngjashëm me sallat e pasurimit të uraniumit në Yongbyon, duke shtuar se analiza e karakteristikave të jashtme tregon një zgjerim të konsiderueshëm të kapacitetit të pasurimit.
Grossi ka deklaruar gjithashtu në një takim të guvernatorëve të agjencisë këtë muaj se po monitorohet një ndërtesë e re në Yongbyon me ngjashmëri me një objekt pasurimi në Kangson, një tjetër vend kyç bërthamor pranë kryeqytetit, Pyongyang.
Pasurimi i uraniumit, sipas ekspertëve, mund të ofrojë një alternativë dhe një rrugë më efektive për sigurimin e materialeve të nivelit të armëve, përveç ripërpunimit të plutoniumit të përdorur të nxjerrë nga një reaktor bërthamor.
Promo
Actori i famshëm vishet me kostum tradicional shqiptar për një film të ri
Aksioni i ri i Netflix me aktorin e njohur shqiptar në rolet kryesore
Filmi shqiptar nominohet për çmimin më prestigjioz në Evropë
BASHKOHUNI NË DISKUTIM