Aktuale

Të paktën 13 persona humbën jetën dhe 57 të tjerë mbetën të plagosur si pasojë e një shpërthimi që ndodhi të martën në mbrëmje në një depo armësh brenda një baze ushtarake në Bujumbura, njoftoi një zëdhënës i ushtrisë së Burundi. Dyshohet se shpërthimi është shkaktuar nga një qark i shkurtër.

Gjenerali Gaspard Baratuza deklaroi në një konferencë për media se nga shpërthimi u shkatërruan ndërtesa, automjete dhe pajisje ushtarake në bazën që ndodhet në një zonë të dendur të kryeqytetit ekonomik të vendit.

Një seri shpërthimesh tronditën zonën, duke i bërë banorët e panikuar të vraponin për t’u strehuar. “Për gati gjashtë orë, predhat fluturonin në qiell dhe binin përreth”, tha një banor për Reuters.

Në periferi të Musagës, ku ndodhet baza ushtarake, një banor tha se pa një grua të rrëzohej përtokë dhe më vonë mësoi se ishte goditur nga një plumb. Një burrë tjetër u vra ndërsa po dilte nga një kishë në lagjen Gasekebuye, sipas një dëshmitari tjetër.