Ekonomi

Kushtetuesja ka shpallur të pavlefshëm një vendim të Gjykata Supreme e Kosovës dhe e ka kthyer çështjen në rivendosje.

Rasti ishte iniciuar nga biznesi individual i Fidan Muhaxhirit, i cili kishte paditur Zyra e Rregullatorit për Energji (ZRRE), duke kërkuar anulimin e Udhëzuesit për daljen e konsumatorëve në tregun e lirë të energjisë elektrike.

Sipas biznesit, ky udhëzues kishte ndryshuar mënyrën e zbatimit të Ligjit për Energji Elektrike dhe e detyronte biznesin të largohej nga furnizimi universal me energji dhe të hynte në tregun e lirë.

Më herët, Gjykata Supreme e kishte hedhur poshtë padinë si të palejueshme, me arsyetimin se udhëzuesi i ZRRE-së kishte vetëm karakter informues dhe nuk ishte akt juridik detyrues.

Por, Kushtetuesja vlerësoi se Supreme nuk kishte shqyrtuar përmbajtjen reale dhe efektet juridike që ky udhëzues kishte për bizneset.

Sipas aktgjykimit, problemi kryesor lidhet me interpretimin e nenit 37.2 të Ligjit për Energji Elektrike, i cili përcakton kriteret për furnizim universal me energji.

Parashtruesi kishte argumentuar se mjafton të plotësohet vetëm një kriter – ose qarkullimi deri në 10 milionë euro, ose jo më shumë se 50 punonjës – për të pasur të drejtë në furnizim universal. Ndërsa udhëzuesi i ZRRE-së, sipas tij, kishte interpretuar se tejkalimi i vetëm njërit kriter e detyron biznesin të dalë në tregun e lirë.

Gjykata Kushtetuese theksoi se gjatë shqyrtimit të rasteve të tilla nuk duhet të merret parasysh vetëm emri formal i një akti, por edhe ndikimi dhe pasojat që ai prodhon në praktikë.

Në aktgjykim thuhet se mosshqyrtimi i padisë nga Gjykata Supreme përbën “formalizëm të skajshëm” dhe mosvlerësim të pasojave ekonomike që udhëzuesi mund të ketë shkaktuar për biznesin.

Për këtë arsye, Kushtetuesja konstatoi se biznesit i ishte cenuar e drejta për qasje në gjykatë dhe urdhëroi që rasti të rikthehet për rivendosje në Gjykatën Supreme.