Aktuale

Franca ka njoftuar se do të fillojë rimbursimin e barnave për humbje peshe, përfshirë medikamentet e njohura si Wegovy dhe Mounjaro, duke nisur nga 15 qershori.

Vendimi u bë i ditur nga Ministrja franceze e Shëndetësisë, Stéphanie Rist, e cila tha se Franca bëhet vendi i parë në Evropë që përfshin këto barna në skemën standarde të rimbursimit shëndetësor.

Sipas saj, rimbursimi zyrtar do të jetë 65%, por në praktikë shumica e pacientëve do të mbulohen plotësisht për shkak të sëmundjeve bashkëshoqëruese si diabeti apo hipertensioni, duke e çuar mbulimin efektiv deri në 100%.

Barnat Wegovy, i prodhuar nga Novo Nordisk, dhe Mounjaro nga Eli Lilly, bëjnë pjesë në një gjeneratë të re terapish për trajtimin e obezitetit, të njohura si agonistë të receptorit GLP-1, të cilat ndihmojnë në uljen e oreksit dhe peshës trupore.

Sipas të dhënave zyrtare, dhjetëra mijëra pacientë në Francë tashmë po trajtohen me këto terapi, ndërsa kostoja mujore e tyre ka qenë rreth 300 euro, duke e bërë të vështirë aksesin për shumë qytetarë.

Terapia është e disponueshme me recetë që nga viti 2024, por vetëm tani është përfshirë në skemën e rimbursimit të sigurimeve shëndetësore.

Vendimi pritet të lehtësojë ndjeshëm qasjen në trajtim për pacientët me obezitet, një problem shëndetësor që prek rreth 18% të popullsisë në Francë dhe një pjesë të madhe të popullsisë në Bashkimin Evropian.