Aktuale

Deputeti opozitar turk, Turhan Çömez, ka kritikuar qeverinë e presidentit Recep Tayyip Erdoğan pas raportimeve për dërgimin e dy automjeteve policore “TOMA” nga Turqia në Shqipëri.

Çömez, përmes një reagimi publik, ka ngritur shqetësime për përdorimin e këtyre automjeteve kundër protestuesve, duke përmendur në mënyrë të veçantë studentët.

“Përvoja juaj në shtypjen e protestave i ka kaluar kufijtë. Tani do të bëheni liderë botërorë duke dërguar në Shqipëri “TOMA” që do të spërkasin studentët me ujë nën presion!”, ka shkruar ai.

Sipas raportimeve në mediat turke, më 19 tetor një avion ushtarak turk transportoi dy automjete “TOMA” drejt aeroportit të Rinasit, pranë Tiranës.

Automjetet “TOMA” përdoren nga forcat e rendit për menaxhimin e turmave dhe shpërndarjen e protestuesve përmes ujit nën presion.

Deri tani, pretendimi se automjetet do të përdoreshin kundër protestuesve mbetet pjesë e kritikave të deputetit turk dhe nuk përbën konfirmim të qëllimit zyrtar të dërgimit të tyre.