Botë

Dogana e Kosovës është përzgjedhur për të organizuar, për herë të parë në Kosovë, një aktivitet sportiv ndërkombëtar të Asociacionit të Sporteve të Doganave Evropiane (ECSA), që do të mbahet në vitin 2027.

Vendimi është bërë i ditur gjatë Mbledhjes së Përgjithshme të ECSA-së në Göteborg të Suedisë, ku Dogana e Kosovës mori pjesë si anëtare e plotë e kësaj organizate.

Aktiviteti do të zhvillohet në një vit të veçantë për ECSA-në, pasi organizata do të shënojë 35-vjetorin e themelimit. Në Kosovë pritet të mblidhen përfaqësues dhe pjesëtarë të administratave doganore nga vende të ndryshme evropiane.

Sipas Doganës së Kosovës, organizimi i këtij aktiviteti përfaqëson një vlerësim për angazhimin e saj në aktivitetet e ECSA-së, si dhe një besim për Kosovën në rolin e nikoqires së një ngjarjeje ndërkombëtare.

Dogana e Kosovës ka falënderuar ECSA-në, presidencën dhe shtetet anëtare për mbështetjen, ndërsa një falënderim të veçantë ia ka adresuar Doganës së Suedisë për mikpritjen dhe organizimin e Mbledhjes së Përgjithshme.

“Kosova është gati. ECSA, mirë se vini në Kosovë!”, thuhet në njoftimin e Doganës së Kosovës.