Aktuale

Unioni i Bizneseve Shqiptaro-Gjermane ka shprehur pritjen që ish-krerët e Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi, të shpallen të pafajshëm pas përfundimit të procesit gjyqësor në Dhomat e Specializuara në Hagë.

Kryetari i Bordit të Unionit të Bizneseve Shqiptaro-Gjermane, Zenun Krasniqi, në një deklarim për Ekolajmi, ka shprehur mbështetjen e tij për ish-krerët e UÇK-së, duke theksuar se pret që pafajësia e tyre të dëshmohet dhe që ata të rikthehen pranë familjeve.

“Ne besojmë se drejtësia do të triumfojë. Lufta e UÇK-së ishte një luftë e drejtë për liri, për mbrojtjen e popullit dhe për të drejtën e shqiptarëve për të jetuar të lirë në vendin e tyre. Prandaj, shpresojmë që ish-krerët e UÇK-së së shpejti të jenë të lirë dhe pranë familjeve të tyre.”

Më 16 shtator 2026, në Hagë pritet të shpallet aktgjykimi ndaj Hashim Thaçit, Kadri Veselit, Rexhep Selimit dhe Jakup Krasniqit, në një proces që ka zgjatur për disa vite. Aktgjykimi është caktuar të shpallet në orën 10:00.
Lufta e Ushtrisë Çlirimtare të Kosovës mbetet një nga kapitujt më të rëndësishëm të historisë së Kosovës. Për shqiptarët në Kosovë dhe diasporë, UÇK-ja përfaqëson rezistencën dhe përpjekjen për çlirim nga represioni dhe për realizimin e aspiratës për liri.

Procesi ndaj ish-krerëve të UÇK-së ka marrë vëmendje të madhe në Kosovë dhe në diasporë, ndërsa vendimi i 16 shtatorit pritet me interes të madh nga familjarët, institucionet dhe qytetarët.
Në mesin e shqiptarëve në Gjermani, çështja e ish-krerëve të UÇK-së vazhdon të përcillet me vëmendje të veçantë. Unioni i Bizneseve Shqiptaro-Gjermane pret që pafajësia e ish-krerëve të UÇK-së të dëshmohet dhe që ata të rikthehen pranë familjeve të tyre. /ekolajmi/