Ekonomi

Lëvizja VETËVENDOSJE!, Kryeministri Albin Kurti dhe partnerët e koalicionit kanë prezantuar zotimin për transformimin e transportit publik në Kosovë përmes programit “Anembanë”, një model i ri që synon ta bëjë lëvizjen më të lehtë dhe më të përballueshme për qytetarët.

Sipas këtij plani, transporti publik në Kosovë do të riorganizohet fillimisht në nivel komunal përmes funksionalizimit të trafikut urban, ndërsa më pas do të integrohet në një rrjet kombëtar ndërurban, me qëllim krijimin e një sistemi të unifikuar transporti në të gjithë vendin.

Një nga elementet kryesore të projektit është vendosja e biletës mujore të integruar, me parimin “një biletë – një çmim”, që do t’u mundësojë qytetarëve udhëtim në të gjithë Kosovën me një pagesë të vetme mujore.

Programi parasheh që kjo biletë të subvencionohet nga shteti dhe të kushtojë rreth 10 euro në muaj, duke synuar uljen e kostove të jetesës dhe lehtësimin e qasjes në punë, shkollim dhe shërbime.

Autoritetet theksojnë se aktualisht transporti publik mbetet i fragmentuar dhe shpesh i paqasshëm në disa zona, veçanërisht në fshatra dhe komuna më të largëta, duke detyruar qytetarët të mbështeten në vetura private.

Sipas planit, programi “Anembanë” synon të adresojë këto sfida duke krijuar një sistem më të koordinuar dhe më të përballueshëm, që ul trafikun, ndotjen dhe kostot familjare, si dhe rrit qasjen në shërbime publike.

Zyrtarët e Lëvizjes Vetëvendosje theksojnë se modeli bazohet në praktika evropiane të subvencionimit të transportit publik dhe synon që lëvizja të trajtohet si e drejtë e garantuar për të gjithë qytetarët, jo si privilegj.