Ekonomi

Paga mesatare neto në Kosovë ka arritur në 636 euro gjatë vitit 2025, duke shënuar rritje prej 15.2 për qind krahasuar me vitin paraprak, sipas të dhënave të publikuara nga Agjencia e Statistikave e Kosovës.

Raporti tregon se paga mesatare bruto është rritur në 713 euro nga 639 euro në vitin 2024, ndërsa paga neto ka kaluar nga 552 në 636 euro.

Rritja e pagave është regjistruar në të gjithë sektorët, por dallimet mbeten të theksuara. Në administratën publike, paga mesatare neto ka arritur në 744 euro, ndërsa në ndërmarrjet publike ka shkuar në 812 euro, duke e bërë këtë sektor më të paguarin në vend.

Në anën tjetër, sektori privat vazhdon të mbetet me pagat më të ulëta. Paga mesatare neto në këtë sektor ka arritur në 596 euro, megjithëse ka shënuar rritje krahasuar me vitin e kaluar.

Sipas raportit, një punëtor në ndërmarrjet publike fiton mesatarisht mbi 200 euro më shumë në muaj sesa një punëtor në sektorin privat.

Sa i përket aktiviteteve ekonomike, sektori i informimit dhe komunikimit ka regjistruar pagat më të larta, me një pagë mesatare neto prej 1,068 eurosh, i ndjekur nga sektori i furnizimit me energji elektrike, gaz dhe avull me rreth 1,000 euro neto.

Pagat më të ulëta janë regjistruar në kategorinë e shërbimeve të tjera, ku paga mesatare neto ishte 387 euro. Diferenca mes sektorit më të paguar dhe atij me pagën më të ulët kalon 680 euro në muaj.

Të dhënat e ASK-së tregojnë se, pavarësisht rritjes së përgjithshme të pagave gjatë vitit 2025, hendeku ndërmjet sektorit publik dhe atij privat vazhdon të mbetet i konsiderueshëm.