Aktuale

Sipas të dhënave të Fondit Monetar Ndërkombëtar (FMN) për vitin 2025, vendet e Ballkanit Perëndimor kanë shënuar rritje të përgjithshme të të ardhurave buxhetore në raport me Prodhimin e Brendshëm Bruto (PBB), por me diferenca të theksuara mes tyre.

Në grupin e vendeve me performancën më të lartë renditen Bosnja dhe Hercegovina, Serbia dhe Mali i Zi, të cilat arrijnë të mbledhin mbi 40% të PBB-së në buxhetin e shtetit.

Bosnja dhe Hercegovina ka regjistruar rritjen më të madhe në rajon, duke u ngjitur në 42.5%, e nxitur kryesisht nga TVSH-ja dhe konsumi i brendshëm. Serbia gjithashtu ruan performancë të fortë me 41%, falë industrisë dhe eksporteve, ndërsa Mali i Zi mbetet rreth 40.3%, me një rënie të lehtë të lidhur me rritjen e PBB-së nga turizmi.

Në nivel mesatar ndodhet Maqedonia e Veriut, e cila ka arritur në 32.2% të PBB-së, duke shënuar përmirësim të lehtë përmes stabilitetit fiskal dhe rritjes së efikasitetit tatimor.

Ndërkohë, Kosova ka shënuar rritje të lehtë në 30.4% të PBB-së, e mbështetur nga përmirësimet në Dogana dhe Administratën Tatimore, si dhe lufta kundër ekonomisë informale.

Në fund të renditjes mbetet Shqipëria me 28.3% të PBB-së, duke shënuar rritje minimale. Sipas analizës, kjo lidhet me informalitetin e lartë dhe vështirësitë në zgjerimin e bazës tatimore në sektorë si turizmi, ndërtimi dhe bujqësia.

Në përgjithësi, raporti i FMN-së tregon se rajoni po përmirëson gradualisht kapacitetet fiskale, por dallimet mes vendeve mbeten të theksuara, sidomos mes ekonomive më të formalizuara dhe atyre me sfida strukturore në mbledhjen e të ardhurave.