Aktuale
Hoti: Projektligji për çmimet tavan është i papërmirësueshëm përmes amendamenteve
Me 63 vota për, Kuvendi i Kosovës më 10 prill ka miratuar në parim Projektligjin për Masat e Përkohshme të Produkteve Themelore në Raste të Veçanta të Destabilizimit në Treg, i njohur si ligji për çmimet tavan.
Ndaj këtij vendimi ka reaguar deputeti i Lidhjes Demokratike të Kosovës (LDK), Avdullah Hoti, i cili e ka kritikuar projektligjin, duke e cilësuar të papërmirësueshëm përmes amendamenteve.
Sipas Hotit, ligji i miratuar në lexim të parë nuk mund të rregullohet as me ndryshime të mundshme në Kuvend dhe, sipas tij, nuk është në përputhje me parimet e tregut të lirë.
Ai ka theksuar se masat e parapara në këtë projektligj nuk e mbrojnë konsumatorin, por përkundrazi dëmtojnë bizneset dhe nuk e arrijnë qëllimin e synuar nga Qeveria.
Hoti ka kritikuar edhe mungesën e debateve publike dhe konsultimeve me akterët ekonomikë, duke ngritur dilema për mënyrën se si, sipas tij, synohet mbrojtja e konsumatorit përmes këtij ligji.
Sipas tij, në situata të tilla ekonomike duhet të ketë ndërhyrje si në anën e kërkesës ashtu edhe në atë të ofertës, duke propozuar mbështetje për grupet më të ndjeshme të qytetarëve dhe ulje të barrës tatimore për bizneset.
Postimi i plotë:
PROJEKTLIGJI PËR ÇMIMET TAVAN ËSHTË I PAPËRMIRËSUESHËM PËRMES AMENDAMENTEVE
Projektligji për çmimet tavan, i cili kaloi në lexim të parë me procedura të shkurtuara, është i papërmirësueshëm. Sot, me shumë kujdes e analizuam këtë projektligj për të parë nëse mund të propozohen amendamente për të evituar çrregullimet në treg që pritet të sjellë ky projektligj nëse hyn në fuqi në formatin aktual të propozuar nga Qeveria.
Vlerësimi i përgjithshëm është se asnjë amendament nuk mund ta sjellë këtë projektligj në linjë me kërkesat dhe parimet për funksionimin e tregut të lirë në kohë të krizave dhe inflacionit, sikurse që po kalojmë tani.
Masat e parapara në këtë projektligj nuk do ta mbrojnë konsumatorin. Ato masa do ta dëmtojnë biznesin dhe nuk sigurojnë arritjen e qëllimit për të cilin ndërmerren. Nuk e kuptoj përse nuk organizohen debate publike me oda ekonomike dhe me organizata të tjera për të marrë vlerësimet e tyre. Nuk e kuptoj përse Qeveria nuk e sqaron publikisht si do të arrihet qëllimi i këtij ligji, që është mbrojtja e konsumatorit, përmes masave të parapara në këtë projektligj.
Logjika ekonomike në situata të tilla kërkon që ndërhyrjet të jenë në të dy anët e tregut, në anën e kërkesës dhe të ofertës.
Në anën e kërkesës duhet ndërmerren masa për të ruajtur grupet më të ndjeshme të qytetarëve, si: punëtorët që marrin pagën minimale, pensionistët, studentët, familjen në asistencë sociale dhe grupe të tjera të ngjashme. Mbështetja e këtyre grupeve nga buxheti i shtetit mund të jetë e njëhershme nëse kriza është e përkohshme dhe nëse çmimet stabilizohen shpejt. Nëse kriza vazhdon, atëherë mbështetja duhet të jetë e përhershme duke i indeksuar të ardhurat e këtyre grupeve për normën e inflacionit të produkteve të konsumit elementar.
Në anën e ofertës duhet të intervenohet në uljen e kostos për bizneset për ofrimin e mallrave në treg. Në këtë aspekt, masë e menjëhershme është ulja e ngarkesave tatimore, siç janë TVSH dhe akciza. Duke qenë se të hyrat buxhetore rriten në kohë inflacioni për shkak të TVSH-së më të lartë në që mbledh shteti, është e natyrshme që ulja e normës së TVSH të ketë efekt minimal ose zero në të hyrat buxhetore.
Prandaj, mungesa e masave të tilla nga ana e Qeverisë së Kosovës është e pakuptueshme se kujt i shërben.
Disa nga këto masa janë ndërmarrë nga vendet evropiane. Shembulli më i fundit ishte Gjermania.
Promo
Actori i famshëm vishet me kostum tradicional shqiptar për një film të ri
Aksioni i ri i Netflix me aktorin e njohur shqiptar në rolet kryesore
Filmi shqiptar nominohet për çmimin më prestigjioz në Evropë
BASHKOHUNI NË DISKUTIM