Aktuale

Donald Trump ka përsëritur kritikat e tij ndaj NATO-s pasi zhvilloi bisedime me Sekretarin e Përgjithshëm të Aleancës në Uashington.

Mark Rutte udhëtoi për në Shtëpinë e  Bardhë me shpresën për të qetësuar bezdinë e presidentit amerikan me anëtarët e tjerë për mos mbështetjen e luftës së tij kundër Iranit.

Konflikti ka tensionuar marrëdhëniet midis Trump dhe personave si Sir Keir Starmer dhe Emmanuel Macron, të cilët kanë qenë kritikë ndaj strategjisë së tij dhe kanë refuzuar të bashkohen me sulmet ushtarake.

Rutte tha për CNN se kishte pasur një “diskutim të sinqertë dhe të hapur” me presidentin rreth shqetësimeve të tij dhe mbrojti udhëheqësit evropianë, përfshirë Sir Keir, i cili tha se kishte ndërmarrë veprime “pozitive” për të ndihmuar në hapjen e Ngushticës së Hormuzit.

Por pas takimit të tyre të mërkurën në mbrëmje, Trump postoi në Truth Social: “NATO nuk ishte aty kur na duhej, dhe nuk do të jetë atje nëse na duhet përsëri”.

Kjo ndodhi vetëm disa orë pasi Shtëpia e Bardhë akuzoi Mbretërinë e Bashkuar dhe aleatët e tjerë të NATO-s se i kishin “kthyer shpinën” Amerikës gjatë luftës së Iranit.

Sekretarja e shtypit Karoline Leavitt deklaroi: “Është mjaft e trishtë që NATO i ktheu shpinën popullit amerikan gjatë gjashtë javëve të fundit, kur është populli amerikan ai që ka financuar mbrojtjen e tij”.

Trump ka gëzuar një marrëdhënie të ngrohtë me Rutte, i cili e përshkroi presidentin si “baba” në një samit të vitit të kaluar.