Aktuale

Ushtruesja e detyrës së Presidentes së Kosovës, Albulena Haxhiu, ka uruar kryeministrin  dhe kabinetin e ri qeveritar pas votimit të Qeverisë në Kuvend.

Përmes një postimi, Haxhiu ka theksuar se institucionet i presin shumë punë të përbashkëta, përfshirë reformat, zhvillimin ekonomik, forcimin e sundimit të ligjit dhe avancimin e pozitës ndërkombëtare të Kosovës.

Ajo ka thënë se Kuvendi do ta kryejë pjesën e tij përmes agjendës legjislative dhe mbikëqyrjes së punës së ekzekutivit, ndërsa ka vlerësuar se me votimet e sotme, Kosova tashmë i ka Kuvendin dhe Qeverinë.

Sipas Haxhiut, mbetet edhe një hap i rëndësishëm për kompletimin e institucioneve – zgjedhja e Presidentit të Republikës.

Ajo u ka bërë thirrje deputetëve që ta ushtrojnë përgjegjësinë e tyre kushtetuese dhe që procesi i zgjedhjes së Presidentit të përmbyllet me sukses.

“Kosova ka nevojë për institucione të forta, funksionale dhe stabile dhe jo për pritje dhe vonesa të reja”, ka shkruar Haxhiu.