Aktuale

Lëvizja VETËVENDOSJE! dhe kryeministri Albin Kurti kanë ritheksuar zotimin për nisjen e procesit të themelimit të një kompanie ajrore me kapital publik, si pjesë e programit qeverisës dhe vizionit për zhvillimin afatgjatë të aviacionit civil në Kosovë.

Ky projekt vjen në një periudhë kur Aeroporti Ndërkombëtar i Prishtinës ka shënuar rritje të vazhdueshme të numrit të udhëtarëve, duke u bërë një nga nyjet kryesore të lidhjes së Kosovës me Evropën dhe botën. Rritja e trafikut ajror dhe roli i diasporës në qarkullimin e pasagjerëve kanë nxitur nevojën për zgjerimin e kapaciteteve strategjike në sektorin e aviacionit.

Sipas vizionit të prezantuar, kompania ajrore publike synon të rrisë konkurrencën në tregun ajror, të zgjerojë lidhjet me qendrat kryesore evropiane dhe të krijojë mundësi të reja për zhvillim ekonomik e profesional. Projekti parashihet të kontribuojë në hapjen e vendeve të reja të punës, zhvillimin e industrive mbështetëse dhe forcimin e lidhjeve të Kosovës me diasporën dhe tregjet ndërkombëtare.

Një pjesë e rëndësishme e kësaj nisme është investimi në kapitalin njerëzor. Në kuadër të zhvillimit të sektorit të aviacionit civil, synohet shkollimi, trajnimi dhe certifikimi i specialistëve vendorë, përfshirë pilotë, kontrollorë ajrorë, inxhinierë, teknikë të mirëmbajtjes, specialistë të sigurisë dhe menaxherë operacionalë.

Përmes bashkëpunimit me akademi dhe kompani të njohura të aviacionit brenda dhe jashtë vendit, synohet krijimi i një gjenerate të re profesionistësh që do të mbështesin zhvillimin e qëndrueshëm të këtij sektori në Kosovë.

Sipas Lëvizjes VETËVENDOSJE!, zhvillimi i aviacionit civil nuk lidhet vetëm me transportin, por edhe me rritjen ekonomike, turizmin, investimet, tregtinë dhe fuqizimin e lidhjeve ndërkombëtare të vendit. Në këtë kuadër, themelimi i një kompanie ajrore publike konsiderohet pjesë e vizionit për një shtet zhvillimor dhe një ekonomi më konkurruese.