Aktuale

Drejtori i Përgjithshëm i Administratës Tatimore të Kosovës, Mentor Hyseni, së bashku me zëvendësdrejtorin Sami Salihu, morën pjesë në konferencën ndërkombëtare “Nga Reforma tek Rezultatet: Dëshmi mbi ndikimin e reformës në administratën tatimore”, e mbajtur në Athinë.

Konferenca u organizua nga Autoriteti i Pavarur për të Ardhurat Publike në bashkëpunim me Fondi Monetar Ndërkombëtar dhe mblodhi drejtues të administratave tatimore, ekspertë ndërkombëtarë dhe përfaqësues të institucioneve financiare nga vende të ndryshme të Evropës dhe rajonit.

Fokusi i konferencës ishte transformimi institucional, digjitalizimi, përdorimi i inteligjencës artificiale dhe ndikimi i reformave në administratat tatimore.

Në kuadër të sesionit “Renditja e reformave dhe qëndrueshmëria – Cilat zgjedhje në renditjen e reformave ishin më të rëndësishmet dhe pse?”, drejtori Mentor Hyseni prezantoi temën “Ndërtimi i besimit, nxitja e rritjes”, ku ndau përvojën e Kosovës në reformimin e administratës tatimore.

Sipas njoftimit të ATK-së, ai theksoi rëndësinë e ndërtimit të besimit me tatimpaguesit, avancimin e shërbimeve digjitale dhe krijimin e një administrate moderne, transparente dhe efikase.

“Transformimi i administratës tatimore nuk matet vetëm me rritjen e të hyrave, por edhe me aftësinë për të ndërtuar besim, transparencë dhe shërbime moderne për tatimpaguesit. Vetëm përmes reformave të qëndrueshme dhe digjitalizimit mund të krijojmë një ambient që nxit zhvillimin ekonomik dhe forcimin e institucioneve”, deklaroi Hyseni.

Gjatë konferencës, përfaqësuesit e ATK-së zhvilluan takime edhe me homologë dhe ekspertë ndërkombëtarë, ku u diskutuan praktikat më të mira për modernizimin e administratave tatimore dhe forcimin e bashkëpunimit rajonal e ndërkombëtar.

ATK vlerësoi se pjesëmarrja në këtë forum ndërkombëtar përbën një mundësi të rëndësishme për shkëmbimin e përvojave dhe avancimin e reformave institucionale në përputhje me standardet moderne evropiane.